கீர்த்தி சுரேஷை நிராகரித்த தமிழ் மாஸ் ஹீரோ! - எதற்கு தெரியுமா?
Saturday April-13 2019

தமிழ் சினிமா மற்றும் தெலுங்கு சினிமாவில் முன்னணி ஹீரோயினாக உருவெடுத்திருக்கும் கீர்த்தி சுரேஷ், தற்போது பாலிவுட் படத்திலும் நடிக்க தொடங்கிவிட்டார்.

‘நடிகையர் திலகம்’ படத்தின் மூலம் தனது நடிப்பு திறனை வெளிப்படுத்திய கீர்த்தி சுரேஷுக்கு பல பட வாய்ப்புகள் குவிய தொடங்கியிருக்கிறது. தற்போது பாகுபலி இயக்குநர் சந்திரமெளலி உள்ளிட்ட இந்தியாவின் முக்கியமான இயக்குநர்களின் பார்வை கீர்த்தி சுரேஷ், மீது விழுந்துள்ளது.

இந்த நிலையில், கோலிவுட்டின் மாஸ் ஹீரோவான சூப்பர் ஸ்டார் ரஜினிகாந்த், கீர்த்தி சுரேஷை நிராகரித்து விட்டதாக தகவல் வெளியாகியுள்ளது.

ரஜினிகாந்த் நடித்துக் கொண்டிருக்கும் ‘தர்பார்’ படத்தில் கீர்த்தி சுரேஷை ஹீரோயினாக்க இயக்குநர் ஏ.ஆர்.முருகதாஸ் முடிவு செய்து வைத்திருந்தாராம். அவர் ஏற்கனவே, ‘சர்கார்’ படத்தில் கீர்த்தியுடன் பணியாற்றியதால், அவரையே இந்த படத்திலும் ஹீரோயினாக்கி விடலாம் என்று நினைத்தாராம்.

இதை ரஜினியிடம் தெரிவித்த போது, சற்று யோசித்த ரஜினி, அவர் எனக்கு செட்டாக மாட்டார், நயன்தாரா சரியாக இருப்பார், என்று கூறிவிட்டாராம். அதனால் தான் படக்குழு கீர்த்தியை விட்டுவிட்டு நயன்தாராவை ஒப்பந்தம் செய்தார்களாம்.