திரைப்பட தயாரிப்பாளர்கள் சங்க தேர்தலுக்கான அட்டவணை வெளியீடு
Friday April-17 2020

கொரோனா பாதிப்பால் திரைப்பட தொழில் பெரிதும் பாதிக்கப்பட்டிருக்கும் நிலையில், பிரபலங்கள் பலர் சினிமா தொழிலாளர்களுக்கும், நலிவடைந்த நடிகர், நடிகைகள் மற்றும் நாடக நடிகர்களுக்கும் உதவி செய்து வருகிறார்கள்.

இந்த நிலையில், 2020-2022 ஆண்டுக்கான தமிழ் திரைப்பட தயாரிப்பாளர்கள் சங்கத்தின் தேர்தலுக்கான அட்டவணை வெளியிடப்பட்டுள்ளது.

இது தொடர்பாக தமிழ் திரைப்பட சங்க அலுவலகம் சார்பில் வெளியிடப்பட்டுள்ள அறிக்கையில் கூறியிருப்பதாவது:

தமிழ் திரைப்பட தயாரிப்பாளர்கள் சங்கத்தின் 2020-2022ம் ஆண்டு தேர்தலுக்கான இறுதி செய்யப்பட்ட வாக்காளர் பட்டியல் 09.05.2020 காலை 10 மணி முதல் சங்க அலுவலகத்தில் அலுவலக வேலை நேரமான 10 a.m. முதல் 6 p.m. வரை நேரில் வந்து பெற்று கொள்ளலாம். (Black & white address  book Rs. 500/-,  colour address book Rs. 2000/-)

தமிழ் திரைப்பட தயாரிப்பாளர்கள் சங்கத்தின் 2020-2022ம் ஆண்டிற்கான தேர்தல்  வருகிற ஜூன் 21ம்  தேதி (21.06.2020) நடைபெறவுள்ளது.  அதற்கான அட்டவணை உறுப்பினர்கள் கவனத்திற்கு தெரிவித்து கொள்கிறோம்.

1. 11.05.2020 காலை 10 மணி முதல் 14.05.2020 மாலை 5 மணி வரை வேட்புமனு தாக்கலுகான விண்ணப்பங்கள் சங்க அலுவலகத்தில் வழங்கப்படும். (ரூ.100 செலுத்தி உறுப்பினர்கள் பெற்றுக்கொள்ளலாம்).

2. 14.05.2020 மாலை 5 மணிக்கு மேல் விண்ணப்பங்கள் வழங்கப்பட மாட்டாது.

3. 15.05.2020 காலை 10 மணி முதல் 19.05.2020 மாலை 4 மணிக்குள் பூர்த்தி செய்யப்பட்ட விண்ணப்ப படிவங்களை சங்க அலுவலகத்தில் மூடி முத்திரை வைக்கப்பட்டுள்ள பெட்டியில் சேர்த்துவிட வேண்டும். (விண்ணப்ப படிவங்களை தபால் அல்லது courier-ல் அனுப்பும் உறுப்பினர்கள் 19.05.2020 மாலை 4 மணிக்ககுள் சங்க அலுவலகத்திற்கு கிடைக்குமாறு ஏற்பாடு செய்ய வேண்டும் என்று கேட்டுக்கொள்படுகிறது)

4. பூர்த்தி செய்யப்பட்ட விண்ணப்ப படிவங்கள் அனைத்தும் சங்க அலுவலகத்தில்  உள்ள மூடி முத்திரையிட்ட பெட்டியில் 

19.05.2020 மாலை 5 மணிக்கு சீல் வைக்கப்படும்.

5. 20.05.2020 காலை 10 மணி முதல் 24.05.2020 மாலை 4 மணி வரை வேட்புமனு விண்ணப்பங்களை திரும்ப பெற்று கொள்ளலாம். மாலை 4 மணிக்கு மேல் விண்ணப்பங்களை திரும்ப பெற இயலாது.

6. 24.05.2020 அன்று மாலை 6 மணிக்கு இறுதி வேட்பாளர் பட்டியல் வெளியிடப்படும். 

25.05.2020 அன்று இறுதி வேட்பாளர் பட்டியல் தேர்தலில் வாக்களிக்கும் தகுதிப்பெற்ற  அனைத்து உறுப்பினர்களுக்கும் தபால் அல்லது courier மூலம் அனுப்பி வைக்கப்படும்.

தயாரிப்பாளர்கள் சங்க தேர்தல் 21.06.2020 அன்று காலை 8 மணி முதல் மாலை 4 மணி வரை நடைபெறும்.

பின்னர் மாலை 5 மணிக்கு வாக்கு எண்ணிக்கை நடைபெறும்.

கொரணா வைரஸ்(COVID-19) ஊரடங்கு உத்தரவு முடிந்தவுடன் தேர்தல் நடைபெறும் இடம் விசாரிக்கப்பட்டு பின்னர் அறிவிக்கப்படும்.

தேர்தலில் போட்டியிடும் உறுப்பினர்களுக்கான கட்டண விவரம் பின்வருமாறு....

தலைவர் பதவிக்கு - ரூ. 1,00,000/- (ரூ.ஒரு லட்சம் மட்டும்)

மற்ற நிர்வாகிகள் பதவிக்கு -  ரூ. 50,000/- (ரூ.ஐம்பதாயிரம் மட்டும்)

செயற்குழு உறுப்பினர் பதவிக்கு -  ரூ. 10,000/- (ரூ.பத்தாயிரம் மட்டும்)

இவ்வாறு அந்த அறிக்கையில் தெரிவிக்கப்பட்டுள்ளது.