இயக்குநர் லிங்குசாமி இயக்கும் புதிய படத்தின் படப்பிடிப்பு தொடங்கியது
Tuesday July-13 2021

தமிழ் சினிமாவின் முன்னணி இயக்குநர்களில் ஒருவரான என்.லிங்குசாமி, தமிழ் மற்றும் தெலுங்கில் உருவாகும் படம் ஒன்றை இயக்குகிறார். ஸ்ரீனிவாசா சில்வர் ஸ்கிரீன் சார்பாக ஸ்ரீனிவாசா சித்தூரி தயாரிக்கும் இப்படத்தில் பிரபல தெலுங்கு இளம் நடிகர் ராம் பொத்தினேனி நாயகனாக நடிக்க, நாயகியாக கீர்த்தி ஷெட்டி நடிக்கிறார். இவர்களுடன் ஆதி பின்னிஷெட்டி, நதியா உள்ளிட்ட பல முன்னணி நட்சத்திரங்கள் முக்கிய கதாப்பாத்திரத்தில் நடிக்கிறார்கள்.

இப்படத்தின் படப்பிடிப்பு நேற்று தொடங்கியது. முதல் நாள் படப்பிடிப்பில் பிரபல திரைப்பட தயாரிப்பாளரும், இயக்குநர் லிங்குசாமியின் சகோதரருமான திருப்பதி பிரதர்ஸ் என்.சுபாஷ் சந்திரபோஸ் கலந்துக்கொண்டு, கிளாப் அடித்து படப்பிடிப்பை துவக்கி வைத்தார்.

சுஜித் வாசுதேவ் ஒளிப்பதிவு செய்யும் இப்படத்திற்கு தேவி ஸ்ரீ பிரசாத் இசையமைக்கிறார். நவீன் நூலி படத்தொகுப்பு செய்ய, அன்பறிவ் சண்டைக்காட்சிகளை வடிவமைக்கின்றனர். சாய் மாதவ், புரரா, பிருந்தா சாரதி ஆகியோர் வசனம் எழுதுகின்றனர்.

தமிழ் மற்றும் தெலுங்கு என இரு மொழிகளில் பிரம்மாண்டமான முறையில் உருவாகும் இப்படத்தின் தமிழக உரிமையை மாஸ்டர் பீஸ் நிறுவனம் பெற்றுள்ளது.