அறிமுக இயக்குநர் நிகேஷ்.ஆர்.எஸ் இயக்கத்தில், ஜீ.வி.பிரகாஷ் குமார் நாயகனாக நடிக்கும் படம் ‘ரெபல்’. இதில் நாயகியாக மமிதா பைஜூ நடிக்க, கருணாஸ், சுப்பிரமணிய சிவா, ஷாலு ரஹீம், வெங்கிடேஷ் வி.பி., ஆதித்யா பாஸ்கர், கல்லூரி வினோத், ஆதிரா உள்ளிட்ட பலர் முக்கிய வேடங்களில் நடித்திருக்கிறார்கள்.

பல பிரமாண்ட திரைப்படங்களை தயாரித்து வரும் கே.ஈ.ஞானவேல்ராஜா ஸ்டுடியோ கிரீன் நிறுவனம் மூலம் தயாரிக்கும் இப்படத்தின் முழு படப்பிடிப்பும் முடிவடைந்துள்ள நிலையில், இன்று படத்தின் முதல் பார்வை போஸ்டர் வெளியாகியுள்ளது. இதனனை நடிகர் சிலம்பரசன் தனது சமூக வலைதளப் பக்கத்தில் வெளியிட்டுள்ளார்.

படத்தின் நாயகன் ஜீ.வி.பிரகாஷ் குமார் போராட்டக்களத்தில் பெட்ரோல் வெடிகுண்டு வீசுவது போன்ற புகைப்படத்துடன் இருக்கும் ‘ரெபல்’ படத்தின் முதல் பார்வை போஸ்டர் மக்களின் கவனத்தை ஈர்த்திருப்பதோடு, சமூக வலைதளம் மற்றும் இணையதளங்களில் வைரலாகி வருகிறது.

படம் குறித்து இயக்குநர் நிகேஷ்.ஆர்.எஸ் பேசுகையில், “1980களில் நடைபெற்ற சில உண்மை சம்பவங்களை தழுவி இப்படத்தின் திரைக்கதை உருவாக்கப்பட்டிருக்கிறது. மேலும் இப்படத்தின் கதை, கல்லூரியை களமாக கொண்டிருக்கிறது. இப்படத்தில்  கல்லூரி மாணவர்களுக்கான அரசியலும் பேசப்பட்டிருக்கிறது. ஜீ.வி. பிரகாஷ் குமாரின் திரையுலக பயணத்தில் இந்த திரைப்படம் முக்கியமான திருப்புமுனையை ஏற்படுத்தும்” என்றார்.

அருண் ராதாகிருஷ்ணன் ஒளிப்பதிவு செய்திருக்கும் இந்த படத்திற்கு ஜீ.வி.பிரகாஷ் குமார் இசையமைத்திருக்கிறார். கிருஷ்ணன் படத்தொகுப்பு செய்ய, கலை இயக்கத்தை உதயா கவனிக்கிறார். சக்தி சரவணன் ஆக்‌ஷன் காட்சிகளை வடிவமைத்திருக்கிறார்.

உண்மை சம்பவங்களை தழுவி உருவாக்கப்பட்டுள்ள இப்படம் அதிரடி ஆக்‌ஷன் மற்றும் பொழுதுபோக்கு திரைப்படமாக உருவாகியுள்ள இப்படத்தின் இறுதி கட்டப் பணிகள் விறுவிறுப்பாக நடைபெற்று வருகிறது.