’கிடாரி’ திரைப்படம் மற்றும் ‘குயின்’ இணையத் தொடரை இயக்கிய பிரசாத் முருகேசன் இயக்கத்தில் உருவாகியிருக்கும் இணையத் தொடர் ‘மத்தகம்’. இதில் அதர்வா நாயகனாக நடிக்க, முதல் முறையாக மணிகண்டன் வில்லனாக நடித்திருக்கிறார். இவர்களுடன் இயக்குநர் கெளதம் மேனன், நிகிலா விமல், டிடி, தில்னாஸ் இராணி, இளவரசு, வடிவுக்கரசி, அருவி திருநாவுக்கரசு, மூணாறு ரமேஷ், சரத் ரவி, ரிஷிகாந்த், முரளி அப்பாஸ் உள்ளிட்ட பலர் முக்கிய வேடங்களில் நடித்திருக்கிறார்கள்.

தர்புகா சிவா இசையமைத்திருக்கும் இத்தொடருக்கு ‘அஸ்வின்ஸ்’ பட புகழ் எட்வின் சாகே ஒளிப்பதிவு செய்திருக்கிறார். பிரவீன் ஆண்டனி படத்தொகுப்பு செய்துள்ளார். ஸ்கிரீன் சீன்ஸ் மீடியா எண்டர்டெயின்மெண்ட் தயாரித்துள்ள இந்த தொடர் வரும் ஆகஸ்ட் 18 ஆம் தேதி டிஸ்னி பிளஸ் ஹாட்ஸ்டார் தளத்தில் வெளியாகிறது.

இந்த நிலையில், ‘மத்தகம்’ தொடரின் நடித்த நடிகர், நடிகைகள் மற்றும் தொழில்நுட்ப கலைஞர்களின் பத்திரிகையாளர் சந்திப்பு மற்றும் தொடரின் இரண்டு அத்தியாரங்கள் திரையிடல் நிகழ்ச்சி நேற்று சென்னை பிரசாத் லேபில் நடைபெற்றது.

திரையிடப்பட்ட இரண்டு அத்தியாசங்கள் விறுவிறுப்பாக இருந்ததோடு, மற்ற அத்தியாயங்களையும் பார்க்க வேண்டும், என்ற ஆர்வத்தை தூண்டியது. மேலும், இரண்டு அத்தியாயங்களை பார்த்த பத்திரிகையாளர்கள் குழுவினரை வெகுவாக பாராட்டினார்கள்.

தொடர்ந்து நடைபெற்ற நிகழ்ச்சியில் பேசிய தொடரின் இயக்குநர் பிரசாத் முருகேசன், “எந்த ஒரு படைப்பும் ஒரு ஆழமான நம்பிக்கையில் தான் இயங்கும், அது போல என்னை நம்பிய தயாரிப்பாளருக்கு நன்றி. எனக்கு ஓடீடீ தளத்தின் மீது மிகுந்த ஆர்வம் இருந்தது. நீண்ட நாள் ஆசையாகவும் இருந்தது. வெப் சீரிஸ் செய்ய வேண்டும் என்று நினைத்து இரண்டு ஆண்டுகளுக்கு முன்பு உருவான படைப்புதான் இந்த மத்தகம், தயாரிப்பாளர் சுந்தர் சாருக்கு மிகவும் கடமைப் பட்டுள்ளேன். இந்த மத்தகம் இந்த பாகத்தோடு மட்டுமில்லாமல் தொடருவதற்கு பல வாய்ப்புண்டு, அதற்கான கதைகளும் உள்ளது. தர்புகா சிவாவிற்கு நன்றி. கிடாரி படத்திலிருந்து என்னுடன் பணி செய்கிறார், அவரது இசை மேலும் என்னை ஊக்குவிக்கிறது. ஒளிப்பதிவாளர் மிகப்பெரிய உதவியாக இருந்தார், இரவில் ஒளி அமைப்பை உருவாக்கப் பல மெனக்கெடல் செய்தார். கௌதம் மேனன் சாருக்கு நான் மிகவும் நன்றி சொல்லக் கடமைப்பட்டுள்ளேன். கிடாரி படம் பார்த்ததிலிருந்து என் மேல் அதிக நம்பிக்கை வைத்தார். இந்த சீரிஸ் உருவாக அவரும் ஒரு முக்கிய காரணம். இன்று ஓடிடி தளம் அனைவரின் வீட்டிலும் கொண்டு போய் சேர்க்கிறது. நடிகர் அதர்வாவிற்கு நன்றி, இந்தப் சீரிஸிற்காக என்னை முழு மனதோடு நம்பினார். அது போல நடிகர் மணிகண்டன் ஒரு மிகச்சிறந்த நடிகர், அவர் கண்டிப்பாக மிகப்பெரிய உயரத்தை அடைவார் என்று எனக்கு மிகுந்த நம்பிக்கை உள்ளது. இந்த படைப்பிற்காக அவர் கொடுத்த உழைப்பு மிகப்பெரியது.  அவருடன் தினமும் பல கதைகள் பற்றி விவாதிப்பேன். நிகிலா விமல் என்னுடைய முதல் படத்தின் கதாநாயகி, ஒரு மாத குழந்தைக்கு அம்மாவாக இதிலும் அவர் சிறப்பான நடிப்பை வெளிப்படுத்தி உள்ளார். இந்த சீரிஸில் நடித்துள்ள அனைத்து நடிகர்களுக்கும் நன்றி. நீங்கள் இல்லை என்றால் இந்த படைப்பு உருவாகி இருக்காது, என்னுடைய குழுவினர் அனைவருக்கும் நன்றி. அனைத்திற்கும் மேல் டிஸ்னி+ ஹாட்ஸ்டார் குழுவிற்கு மிகவும் நன்றி, இந்தப் படைப்பை மக்களிடம் கொண்டு செல்ல அயராது உழைத்துள்ளனர். உங்கள் அனைவருக்கும் இந்தப்படைப்பு கண்டிப்பாகப் பிடிக்கும் என்று நம்புகிறேன் நன்றி.” என்றார்.

நடிகர் மணிகண்டன் பேசுகையில், “என்னுடைய சிறு சிறு முயற்சிகளுக்கு ஆதரவு அளித்து வந்த பத்திரிக்கையாளர்களுக்கு எனது நன்றி. இந்த சீரிஸ் பொறுத்த வரை எனக்கு மிகவும் எதிர்பார்ப்புக்கு மீறிய கதாபாத்திரம். இந்த சீரிஸின் படப்பிடிப்பு இரவில்தான் அதிகம் நடைபெற்றது. இயக்குநரின் உழைப்புதான் அந்த நேரத்திலும் எங்களை ஊக்குவித்தது. இந்த சீரிஸில் பல பல சிறு கதாபாத்திரங்கள் உள்ளது. ஆனால் சிறு கதாபாத்திரம் என்றாலும் அதற்கென தனி மெனக்கெடலைக் கொடுத்துள்ளனர். ஒளிப்பதிவாளர் மற்றும் இயக்குநர் இடைவிடாத பணியைக் கொடுத்துள்ளனர். இந்த படைப்பைப் பார்த்த பிறகு எங்களின் உழைப்பை விட இயக்குநரின் உழைப்பிற்குக் கிடைத்த வெற்றி என்றுதான் எங்களுக்குத் தோன்றியது. கண்டிப்பாக உங்களுக்கும் இது மறக்க முடியாத அனுபவத்தைக் கொடுக்கும் நன்றி.” என்றார்.

நடிகர் அதர்வா பேசுகையில், “மத்தகம் இப்ப ரிலீஸாகுது, ஆனா இது 2018, 19 ல ஆரம்பிச்சது. கௌதம் மேனன் சார் தான் இயக்குனர் பிரசாத் முருகேசனை அறிமுகம் செய்து வைத்தார். இந்தக் கதை முதல்ல பைபிள் பேர்ல இருந்தது. பல மாற்றங்கள் வந்தது. எப்படி வரப்போகுதுன்னு தயக்கம் இருந்தது. இப்ப வரக்காரணம் டிஸ்னி+ ஹாட்ஸ்டார் தான், அவங்களுக்கு ரொம்ப நன்றி. பிரசாத் சார் இந்தக் கதையை குயினுக்கு முன்னாடியே எழுதிட்டார். மத்தகம் கதை ரொம்ப சூப்பரா வந்திருக்கு. அவர் நினைச்சத கொண்டு வந்துருக்காரு. முழுக்க நைட்ல தான் ஷீட் பண்ணோம். லைட் ஆஃப் பண்ணி எடுத்தாங்க, நான் தெரிவனா தெரிய மாட்டேனானு சந்தேகமா இருந்தது. ஆனா நான் நடிச்சதில பெஸ்ட்டாக இருக்கும். இப்ப நான் எங்க போனாலும் மணிகண்டன் பத்தி கேட்குறாங்க. அவர் கூட 2 நாள் தான் ஷூட் அப்பவும் தனித்தனியா வச்சு எடுத்தாங்க. உண்மையில மணி ரொம்ப ஹானஸ்டான மனிதர் அவர் கூட வேலை பார்த்தது சந்தோசம். டிஸ்னி+ ஹாட்ஸ்டார்ல வருது பார்த்து ஆதரவு தாங்க.” என்றார்.

நிகழ்ச்சியில் ஒளிப்பதிவாளர் எட்வின் சாகே பேசுகையில், “இயக்குநருக்கு நன்றி. பிரசாத் இயக்கத்தில் பணிபுரியனும்றது என் ஆசை. ஒரு ஃபுல் நைட்ல நடக்கிற கதை. இதுக்காக அதர்வா, மணிகண்டன் குழு கொடுத்த ஆதரவிற்கு நன்றி. உங்கள் எல்லோருக்கும் இந்த சீரிஸ் பிடிக்கும் நன்றி.” என்றார்.

கலை இயக்குநர் சுரேஷ் பேசுகையில், “இந்த சீரிஸின் செட் வேலைக்காக மிகுந்த மெனக்கெடல் உழைப்பைப் போட்டுள்ளோம். இரவு நேரக் காட்சி என்பதால் மிக அதிகப்படியான வேலை இருந்தது. இயக்குநரின் ஆர்வம் தான் எங்களுக்கு ஒரு உந்துதலாக இருந்தது. சீரிஸிற்க்கு தேவையான அனைத்தையும் உண்மையான அர்ப்பணிப்புடன் கொடுத்துள்ளோம். உங்களுக்குப் பிடிக்கும் என நம்புகிறேன் நன்றி.” என்றார்.

எடிட்டர் பிரவின் பேசுகையில், “இந்த சீரிஸ் ஒரு நல்ல திரில்லர் கதை. சீரிஸின் திரைக்கதையைக் கேட்கும்போதே மிக ஆர்வமாக இருந்தது. நடித்த அனைவரும் மிகச்சிறந்த இயல்பான நடிப்பை வெளிப்படுத்தி உள்ளனர். இரவு நேரங்களில் அதிக காட்சிகள் இருப்பதால் ஒளிப்பதிவாளர் மிகவும் சிரமப்பட்டு வேலை செய்துள்ளார். தர்புகா சிவாவின் இசை சிறப்பாக அமைந்துள்ளது, இசை இந்தக்கதைக்கு பெரிதும் உதவியுள்ளது. கண்டிப்பாக உங்கள் அனைவருக்கும் ஒரு புதிய அனுபவத்தை இந்த படைப்பு கொடுக்கும் என்று நம்புகிறேன் நன்றி.” என்றார்.