ஆதி போட்டோஸ் நிறுவனம் சார்பில் ஏ.டி.ஆதி நாடார் தயாரித்து இயக்கிய படம் ‘விருது’. புதுமுகங்கள் நடிப்பில் திரையரங்குகளில் வெளியான இப்படம் 40 நாட்கள்  வெற்றிகரமாக ஓடி லாபத்தை கொடுத்தது. தற்போது இப்படக்குழுவினர் தங்களது இரண்டாம் படத்தின் பணியில் ஈடுபட்டுள்ளனர். 

‘உலகநாதன்’ என்ற தலைப்பில் உருவாகும் இப்படம் கிராமிய கதையமைப்போடு காதலும், மோதலும் சென்டிமென்ட்டும் கலந்த குடும்ப திரைப்படமாக உருவாகிறது. இந்தப் படத்தின் படப்பிடிப்புகள் அனைத்தும் மதுரை மற்றும் இராஜபாளையத்தைச் சுற்றியுள்ள அழகான பகுதிகளில் நடந்திருக்கிறது. 

விருது படத்தை இயக்கிய ஏ.ஆதவன் இப்படத்தையும் இயக்கியிருக்கிறார். விருது படத்தில் கதாநாயகனாக நடித்த அட்சயன் இந்தப் படத்திலும் கதாநாயகனாக நடித்திருக்கிறார். நடிகர் கஞ்சா கருப்பு நகைச்சுவை மற்றும் குணச்சித்திர வேடத்தில் நடித்திருக்கிறார். ஹீரோ அட்சயனுக்கு ஜோடியாக யோகதர்சினி, கிரேட்டா இரண்டு புதுமுக நாயகிகளும் இணைந்து நடித்திருக்கிறார்கள். ஹீரோவின் அம்மாவாக விஜய் டி.வி. புகழ் சசிகலா நடித்திருக்கிறார். வில்லனாக புதுமுக நடிகர் கடற்கரை நடித்திருக்கிறார். 

கதாநாயகன் சிலம்பம் பயிற்சி முழுமையாக பெற்றவர் என்பதால் சிலம்பம் இடம்பெறும் சண்டைக்காட்சிகளில் அவரே டூப் இல்லாமல் நடித்து படப்பிடிப்பை வேடிக்கைப் பார்க்க வந்தவர்கள் அத்தனைப் பேரின் கைத்தட்டல்களையும், பாராட்டுக்களையும் பெற்றிருக்கிறார். 

சார்லஸ் தனா இசையமைத்திருக்கும் இப்படத்தின் பாடல்களை சார்லஸ் தனா மற்றும் ராமநாதன் எழுதியிருக்கிறார்கள். கணேஷ் சார் பிரசாத் ஒளிப்பதிவு செய்ய, முருகேசன் நடனக் காட்சிகளை வடிவமைத்திருக்கிறார். ஒப்பனை மற்றும் ஆடை வடிவமைப்பை எஸ்.பிரபாவதி கவனிக்கிறார்.

ஏ.டி.ஆதி நாடார் மிகப்பெரிய அளவில் தயாரிக்கும் இப்படத்தின் கதை, திரைக்கதை, வசனம் எழுதி இயக்குவதோடு சண்டைப்பயிற்சி மற்றும் படத்தொகுப்பு பணிகளையும் ஏ.ஆதவன் கவனிக்கிறார்.