‘பொன்னியின் செல்வன்’ படம் மூலம் தமிழ் சினிமாவில் அறிமுகமான சோபிதா துலிபாலா, ‘மேட் இன் ஹெவன்’ மற்றும் ‘தி நைட் மேனேஜர்’ போன்ற ஹிந்தி வெப் தொடர்களில் தனது அற்புதமான நடிப்பின் மூலம் இந்திய சினிமாவின் கவனத்தை ஈர்த்தார். 

அனுராக் காஷ்யப் இயக்கிய அவரது முதல் படமான ‘ராமன் ராகவ் 2.0’ படத்தில் அவரது நடிப்பு, கேன்ஸ் திரைப்பட விழாவில் சிறந்த நடிகைக்கான பரிந்துரையை பெற்றதுடன், விமர்சன ரீதியாகவும் பாராட்டப்பட்டார். மலையாளத்தில் துல்கர் சல்மானுடன் ‘குரூப்’ மற்றும் தெலுங்கில் ‘கூடாச்சாரி’, ‘மேஜர்’ போன்ற வெற்றிப் படைப்புகளை வழங்கிய சோபிதா, தற்போது இந்திய சினிமாவை கடந்து, சர்வதேச திரையுலகில் அறிமுகமாகிறார்.

தேவ் படேல் இயக்கிய ஆஸ்கார் விருது பெற்ற ஜோர்டான் பீலேவுடன் இணைந்து யுனிவர்சல் பிக்சர்ஸின் தயாரிப்பான ’மங்கி மேன்’ என்ற த்ரில்லர் படத்தின் மூலம் சோபிதா துலிபாலா ஹாலிவுட்டில் அறிமுகமாகிறார். ’விப்லாஷ்’ போன்ற விருது பெற்ற திரைப்படங்களில் பணியாற்றி, அவரது பங்களிப்புகளுக்காக அங்கீகரிக்கப்பட்ட ஷரோன் மேயர், இப்படத்திற்கு ஒளிப்பதிவு செய்திருக்கிறார்.  

சமீபத்தில் வெளியான ’மங்கி மேன்’ திரைப்படத்தின் டிரைலர் உலக அளவில் கவனம் ஈர்த்து டிரெண்டாகி வரும் நிலையில், வரும் ஏப்ரல் மாதம் 5 ஆம் தேதி உலகம் முழுவதும் திரையரங்குகளில் வெளியாகும் என்று படக்குழு அறிவித்துள்ளது.