கொரோனா பாதிப்பால் திரையரங்கங்கள் மூடப்பட்டிருக்கிறது. இதனால், புதிய திரைப்படங்களை நேரடியாக ஒடிடி-யில் வெளியிட்டு வருகிறார்கள். இதற்கு மக்களிடமும் நல்ல வரவேற்பு கிடைப்பதால், முன்னணி நடிகர்களும் தங்களுடைய படங்களை ஒடிடியில் வெளியிடுவதில் ஆர்வம் காட்டி வருகிறார்கள்.

இந்த நிலையில், நடிகர் சூர்யாவின் 2டி தயாரிப்பில் உருவாகியுள்ள ’ஜெய் பீம்’, ‘உடன்பிறப்பே’, ‘ஓ மை டாக்’, ‘ராமன் ஆண்டாலும் ராவணன் ஆண்டாலும்’ ஆகிய நான்கு படங்கள் நேரடியாக அமேசான் ஒடிடி-யில் வெளியாக உள்ளது. இதற்கான அதிகாரப்பூர்வ அறிவிப்பு இன்று வெளியாகியுள்ளது.

த.செ.ஞானவேல் இயக்கியிருக்கும் ‘ஜெய் பீம்’ படத்தில் சூர்யா முக்கியமான கதாப்பாத்திரம் ஒன்றில் நடித்திருக்கிறார். அவருடன், பிரகாஷ்ராஜ், ரமேஷ் ராவ், லிஜாமோள் ஜோஸ், ரஜிஷா விஜயன் மற்றும் மணி கண்டன் ஆகியோரும் முக்கிய கதாப்பாத்திரங்களில் நடித்திருக்கிறார்கள்.

இயக்குநர் சசிகுமார், ஜோதிகா முதன்மை கதாப்பாத்திரத்தில் நடித்திருக்கும் ‘உடன்பிறப்பே’ குடும்ப பொழுதுபோக்கு திரைப்படமாக உருவாகியுள்ளது. சமுத்திரக்கனி, சூரி, கலையரசன், நிவேதிதா சதீஷ், சித்து ஆகியோர் நடித்திருக்கும் இப்படத்தை இரா.சரவணன் இயக்கியுள்ளார்.

அறிமுக இயக்குநர் சரோவ் சண்முகம் இயக்கியிருக்கும் ‘ஓ மை டாக்’ சிறுவர்களுக்கான படமாக உருவாகியுள்ளது. இதில், அருண் விஜய் மற்றும் அவருடைய மகன் அர்ணவ் விஜய், அவருடைய தந்தையும் பிரபல நடிகருமான விஜயகுமார், மகிமா நம்பியார், வினை ராய் ஆகியோர் நடித்துள்ளனர்.

அரிசில் மூர்த்தி இயக்கியிருக்கும் ‘ராமன் ஆண்டாலும் ராவணன் ஆண்டாலும்’ நையாண்டி நகைச்சுவையை மையப்படுத்திய திரைப்படமாக உருவாகியுள்ளது. இதில், ரம்யா பாண்டியன், வாணி போஜன், மிதுன் மாணிக்கம், வடிவேல் முருகன் உள்ளிட்ட பலர் நடித்துள்ளனர்.

வெவ்வேறு பாணியில் உருவாகியுள்ள இந்த நான்கு படங்களும், செப்டம்பர் மாதம் முதல் டிசம்பர் மாதம் வரை, ஒரு மாதத்திற்கு ஒரு படமாக வெளியாக உள்ளது.