கர்நாடக மாநிலத்தில் உள்ள சிறு கிராமம் ஒன்றில் பிறந்து, ஒரே ஒரு லாரியை வைத்துக்கொண்டு சரக்கு போக்குவரத்து நிறுவனத்தை தொடங்கிய விஜய் சங்கேஸ்வரின், வி.ஆர்.எல் நிறுவனம் தற்போது 4300 வாகனங்களை கொண்ட இந்தியாவின் மிகப்பெரிய சரக்கு போக்குவரத்து நிறுவனமாக செயல்பட்டு வருகிறது.

இந்த தொழில் மட்டும் இன்றி பல்வேறு தொழிகளை வெற்றிகரமாக நடத்தி வரும் விஜய் சங்கேஸ்வரின் அசாதாரணமான வாழ்க்கை தான் ‘விஜயானந்த்’ திரைப்படமாக உருவாகியுள்ளது. மிகப்பெரிய பொருட்ச் செலவில், கன்னடம், தமிழ், தெலுங்கு, மலையாளம் மற்றும் இந்தி என பான் இந்தியா திரைப்படமாக உருவாகியுள்ள இப்படம் வரு டிசம்பர் 9 ஆம் தேதி திரையரங்குகளில் வெளியாக உள்ளது.

இந்த நிலையில், ‘விஜயானந்த்’ திரைப்படத்தின் டிரைலர் வெளியீட்டு விழா நவம்பர் 19 ஆம் தேதி பெங்களூரில் மிக பிரமாண்டமான முறையில் நடைபெற்றது. இதில் கர்நாடக மாநில முதல்வர் பசவரஜ் பொம்மையா சிறப்பு விருந்தினராக கலந்துக்கொண்டு ‘விஜயானந்த்’ படத்தின் டிரைலரை வெளியிட்டார்.

நிகழ்ச்சியில் பேசிய முதல்வர் பசவராஜ் பொம்மையா பேசுகையில், “நான் விஜயை 1985-ல் சந்தித்தேன். ஒரு சாகசகாரராக தான் அவர் எனக்கு தெரிந்தார். எப்பொழுதும் அவரிடம் ஒரு தாகம் இருக்கும், எப்பொழுதும் கிரியேட்டிவாக யோசிக்க கூடியவர்.  அவர் இதுவரை நடத்திய அனைத்து தொழில்களுமே லாபகரமான ஒன்றாக இருந்து இருக்கிறது. முடியாததை முடிப்பது தான் அவரது பாணி. அவர் லோக்சபா எம் பி ஆக இருந்தார், அப்பொழுதும் நேரம் தவறாமை தான் அவரது பலம்.  அவரது கடின உழைப்பு அவருக்கு எல்லா துறைகளிலும் பலத்தை கொடுத்து இருக்கிறது.   அவர் எதை தொட்டாலும் வெற்றி தான். இந்த சுயசரிதை படம் பல மொழிகளில் வெளியாவது எனக்கு மகிழ்ச்சியை கொடுக்கிறது. இந்த படம் மிகப்பெரிய வெற்றியடைய எனது வாழ்த்துகளை தெரிவித்து கொள்கிறேன்.” என்றார்.

வி ஆர் எல் நிறுவனத்தின் உரிமையாளரும், தொழிலதிபருமான விஜய் சங்கேஸ்வர் பேசுகையில், “நடிகர்  புனித் ராஜ் குமார் மரணம் என்னை துக்கத்தில் ஆழ்த்தியது. அவர் மக்கள் மத்தியில் நீங்காத இடத்தை பிடித்துள்ளார். அவரை இந்த நேரத்தில் நினைத்து பார்க்கிறேன். எனது 73 வருட வாழ்கையில் வாழ்கை எவ்வளவு அழகானது, ஆழமானது ஆச்சர்யமானது என்பதை கற்று கொண்டேன். இளைய தலைமுறைக்கு நான் கொடுக்கும் அறிவுரை என்னவென்றால் தயவு செய்து நேரத்தை வீணாக்காதீர்கள். எனக்கு நிறைய நேரம் இருந்து இருந்தால், நான் இன்னும் நிறைய விஷயங்களை செய்து இருப்பேன்.  அதனால் இளைய தலைமுறை உங்களது நேரத்தை ஆக்க பூர்வமாக செயல்படுத்துங்கள். இந்த திரைப்படம் உங்களுக்கு நம்பிக்கை தரும். படம் வெற்றி பெற வாழ்த்துக்கள். ” என்றார்.

நடிகர் நிஹால் பேசுகையில், “ஒரு தலைமுறைக்கு நம்பிக்கை தரும் மிகப்பெரும் சாதனையாளராக நான் நடிப்பது பெருமை. நாம் எல்லாம் சாதாரண மனிதர்கள் லீவு நாளில் ஓய்வெடுப்போம் ஆனால் இவர் எத்தனையோ ஆண்டுகள் ஓய்வில்லாமல் உழைத்திருக்கிறார். அவரது சாதனைகள் வாழ்வில் வெற்றிபெற விரும்பும் அனைவருக்கும் பாடம். இதனை திரைப்படமாக எடுப்பதில் நாங்கள் பெருமை கொள்கிறோம். இப்படத்திற்காக அனைவரும் கடுமையாக உழைத்துள்ளனர். அனைத்து மொழிகளிலும் இப்படத்தை கொண்டாடுவார்கள் என நம்புகிறேன்.” என்றார்.

இயக்குநர் ரிஷிகா சர்மா இயக்கத்தில் தயாராகியிருக்கும் ’விஜயானந்த்’ திரைப்படத்தில் கதையின் நாயகனான விஜய் சங்கேஸ்வர் கதாபாத்திரத்தில் நடிகர் நிஹால் நடித்திருக்கிறார். இவருடன் ஆனந்த் நாக், ரவிச்சந்திரன், பாரத் பொப்பண்ணா, பிரகாஷ் பெலவாடி, ஸ்ரீ பிரகலாத், வினயா பிரசாத், அர்ச்சனா, அனிஷ் குருவில்லா உள்ளிட்ட பலர் நடித்திருக்கிறார்கள். 

கீர்த்தன் பூஜாரி ஒளிப்பதிவு செய்திருக்கும் இந்த திரைப்படத்திற்கு கோபி சுந்தர் இசையமைத்திருக்கிறார். சுய சரிதையை தழுவி தயாராகும் இந்த திரைப்படத்தை வி ஆர் எல் பிலிம்ஸ் நிறுவனம், பிரம்மாண்டமான பொருட்செலவில் தயாரித்திருக்கிறது.