யூபோரியா பிலிக்ஸ் நிறுவனம் தயாரிப்பில், சந்தோஷ் பாபு முத்துசாமி இயக்கத்தில் விமல் நாயகனாக நடிக்கும் சூப்பர் நேச்சுரல் திகில் படம் ‘பெல்லடோனா’. இதில் கதாநாயகியாக தேஜஸ்வினி ஷர்மா நடிக்க, மற்றொரு நாயகியாக மணிப்பூரை சேர்ந்த மேக்சினா பவ்னம் நடிக்கிறார். 

வினோத் பாரதி ஒளிப்பதிவு செய்யும் இப்படத்திற்கு, ஏசி ஜான் பீட்டர் இசையமைக்கிறார். தீபக் எடிட்டிங் செய்ய, இயக்குநர் சந்தோஷ் பாபு முத்துசாமி பாடல்கள் எழுதியுள்ளார். டேஞ்சர் மணி சண்டைக்காட்சிகளை வடிவமைக்கிறார்.

படம் குறித்து இயக்குநர் சந்தோஷ் பாபு முத்துசாமி கூறுகையில், “இந்த படம் விமல் சாருக்கு  ஒரு புதுவிதமான அனுபவத்தை கொடுக்கும். மிகவும் பிரம்மாண்டமாக படமாக்கப்பட்டு நன்றாக வந்துள்ளது. இந்த கதைக்கு ஏற்றார் போல் சக நடிகர்களும் அமைந்துள்ளனர். கேமராமேன், எடிட்டர், மியூசிக் டைரக்டர் என அனைவரும் மிக பக்கபலமாக இருந்து உழைத்து வருகின்றனர்.” என்றார்.

விமலின் 35வது திரைப்படம் ’பெல்லடோனா’ தமிழ், தெலுங்கு, கன்னடம், மலையாளம், ஹிந்தி, மணிப்புரி உள்ளிட்ட 16 மொழிகளில் வெளியாக உள்ளது குறிப்பிடத்தக்கது.