’டிரோன்ஸ்’ திரைப்பட விமர்சனம்

டிராவிட் செல்வம், அஞ்சலி நாயர் மற்றும் ஆர்.ஜே.தீபக் கல்லூரியில் இருந்து இடை நீக்கம் செய்யப்படுகிறார்கள். பெற்றோர்களுக்கு தெரியாமல் இருக்க இந்த காலக்கட்டத்தில் வெளியே தங்க முடிவு செய்யும் இவர்கள், பிளாக் ஹோல் என்று சொல்லக்கூடிய அறிவியல் ஆராய்ச்சிக் கூடம் ஒன்றில் தங்குகிறார்கள். ஒரு முறை அதற்குள் செல்லும் இவர்களால் அங்கிருந்து வெளியேற முடியாத சூழல் உருவாகிறது. அப்போது டிரோன் ஒன்றின் மூலம் வெளி உலகத்தை பார்க்கிறார்கள். அப்போது அழகிய இளம் பெண்ணான சித்தி இத்னானி அங்கு இருப்பதை பார்க்கிறார்கள். அவர் மீது டிராவிட் செல்வத்திற்கு காதல் மலர்கிறது. இந்த காதலுக்கு எதிர்ப்பு தெரிவிக்கும் சித்தி இத்னானியின் சூனியக்காரி பாட்டியான தேவதர்ஷினி, இவர்களை சிறை பிடிக்கிறார்.

மறுபக்கம், மாயமான கல்லூரி மாணவர்களை தேடி சிலர் அந்த வீட்டுக்குள் வருகிறார்கள். அவர்களில் காவல்துறை அதிகாரியான சினிமாவாலா சதிஷும் ஒருவர். திருமண வயதை தாண்டியும் திருமணம் ஆகாத, சினிமாவாலா சதிஷும், அந்த இளம் பெண்னின் அழகில் மயங்கி அவரை காதலிக்க தொடர்ங்குகிறார்.

இப்படி பலர் அவரது அழகில் மயங்கி அவரை காதலித்தாலும், அந்த அழகுக்கு பின்னால் ஒரு மர்மமும், அந்த மர்மத்தின் பின்னணியில் ஒரு பெண்ணின் சோகமும் இருக்கிறது. அது என்ன ?, அது தெரிந்த பிறகு காதலிக்க மறுக்கும் ஆண்களின் நிலை என்னவாகும் ?, அவரிடம் சிக்கிய கல்லூரி மாணவர்கள் உள்ளிட்டோரின் நிலை என்ன ? , ஆகிய கேள்விகளுக்கான விடையை நகைச்சுவையாக மட்டும் இன்றி சமூக சிந்தனையோடு சொல்வது தான் ‘டிரோன்ஸ்’.

பாட்டி கதையையும், பறக்கும் தட்டு என்ற கற்பனையையும் வைத்து இயக்குநர் ஆர்.ராகவ் மிர்தாத் எழுதியிருக்கும் திரைக்கதை, அழகி, சூனியக்காரி, அறிவியல் ஆராய்ச்சி ஆகியவற்றுடன் நிற அரசியலையும் சேர்த்து நகைச்சுவையாக கொடுத்திருப்பதோடு சிந்திக்க வைக்கவும் செய்கிறது.

கதாநாயகியாக நடித்திருக்கும் சித்தி இத்னானி, அழகில் தேவதையாகவும், நடிப்பில் அரக்கியாகவும் கவனம் ஈர்க்கிறார். மற்றொரு நாயகியாக நடித்திருக்கும் அஞ்சலி நாயர், நிற பாகுபாடு பார்ப்பவர்களுக்கு தன் நடிப்பு மூலம் சாட்டையடி கொடுத்திருக்கிறார். கதாபாத்திரத்தை உணர்ந்து நடித்திருக்கும் அஞ்சலி நாயர், அழுத்தமான கதாபாத்திரத்தை மிக அழகாக கையாண்டு பாராட்டு பெறுகிறார்.

நாயகனாக நடித்திருக்கும் டிராவிட் செல்வம், காமெடி கதாபாத்திரம் என்பதால் அதற்கான அனைத்து அம்சங்களையும் தனது நடிப்பில் வெளிப்படுத்தி, கதாபாத்திரத்திற்கு பலம் சேர்த்திருக்கிறார்.

சூனியக்காரியாக நடித்திருக்கும் தேவதர்ஷினி வித்தியாசமான கதாபாத்திரத்தை மிக சிறப்பாக கையாண்டிருக்கிறார். அவரது அனுபவம் வாய்ந்த நடிப்பும், கடுமையான உழைப்பும் அந்த கதாபாத்திரத்தை உயர்த்தில் உட்கார வைத்து விடுகிறது.

காவல் துறை அதிகாரியாக நடித்திருக்கும் சினிமாவாலா சதீஷ், தன் அளவான நடிப்பின் மூலம் கவனம் ஈர்க்கிறார். குரேஷி வரும் காட்சிகள் சிரிக்க வைக்கிறது. ஆர்.ஜே.தீபக் மற்றும் சசி செல்வராஜ் ஆகியோரும் தங்களது வேலையை குறையின்றி செய்திருக்கிறார்கள்.

ஒளிப்பதிவாளர் ஜெயந்த் சேது மாதவன், குறிப்பிட்ட ஒரு லொக்கேஷனில் பெரும்பாலான காட்சிகளை காட்சிப்படுத்தினாலும், கதைக்களத்திற்கு பலம் சேர்க்கும் வகையில் பணியாற்றியிருக்கிறார்.

இசையமைப்பாளர் ஹரி.எஸ்.ஆர்-ன் இசையில் பாடல்கள் ஓகே ரகம். பின்னணி இசை காட்சிகளுக்கு பலம் சேர்க்கும் வகையில் பயணித்திருக்கிறது.

படத்தொகுப்பாளர் சதீஷ் சூர்யா, கலை இயக்குநர் ஆர்.கிஷோர், ஆடை வடிவமைப்பாளர் ஹர்ஷிகா ரமேஷ் ஆகியோரது பணி படத்திற்கு சிறப்பு சேர்த்திருக்கிறது.

நாம் படித்த அழகி மற்றும் சூனியக்கார கிழவி கதைக்கு வேறு ஒரு வடிவத்தை கொடுத்ததோடு, அதை அறிவியல் பின்னணியில் நகைச்சுவையாக சொல்லி சிரிக்க வைத்திருக்கும் இயக்குநர் ஆர்.ராகவ் மிர்தாத், சிந்திக்க வைக்கும் ஒரு விசயத்தையும் படத்தில் பேசியிருப்பது பாராட்டுக்குரியது.

முதல் பாதி படம் பார்வையாளர்களை சற்று சோர்வடைய செய்தாலும், இரண்டாம் பாதி படம் நிமிர்ந்து உட்கார வைத்து விடுகிறது. எதிர்பார்க்காத திருப்பங்கள் மற்றும் சமூக பிரச்சனை ஆகியவற்றை மேலோட்டமாக கையாண்டிருந்தாலும், அதை காமெடி பின்னணியில் கவனம் ஈர்க்கும் வகையில் சொல்லியிருக்கும் இயக்குநர் ஆர்.ராகவ் மிர்தாத், சிறுவர்கள் முதல் பெரியவர்கள் வரை, என அனைத்து தரப்பினரும் கொண்டாடக்கூடிய ஒரு கலகலப்பான படத்தை கொடுத்ததில் வெற்றி பெற்றிருக்கிறார்.

மொத்தத்தில், ‘டிரோன்ஸ்’ மனதை மகிழ்வித்து பறக்கும் அனுபவத்தை கொடுக்கும்.

ரேட்டிங் 3.8/5